Ақан серінің көзі
Ықылас атындағы Халық музыкалық аспаптар музейіне ақын, әнші-композитор Ақан сері Қорамсаұлының домбырасы салтанатты түрде тапсырылды. Мерекелік шараға Алматы қаласының әкімі Бауыржан Байбек арнайы келіп, құнды жәдігерді музей сөресіне өз қолымен орналастырды.
Дарын иесіне ұзақ жыл серік болған аспапты кезінде Қазақстанның халық жазушысы Сәкен Жүнісов туыстарынан алған екен. Қарымды қаламгердің Ақан серінің өмірі мен шығармашылығын түбегейлі зерттеп, екі том роман жазғаны жұртшылыққа мәлім. Әкесі өмірден өткеннен кейін қызы Гүлмира мемлекеттік мекеменің ғылыми-зерттеу жұмыстары нәтижесінде құнды жәдігерді музей қорына тапсырып, көпшілік көзайымына айналдыруды жөн санапты.
Ұлы тұлғаларымыз бен асыл өнерімізді насихаттау арқылы ұлт руханиятын жаңғыртуды көздеген кештің жүргізушісі, Мәдениет қайраткері Мұрат Әбуғазы қазақ өнерінің алтын ғасыры – ХІХ ғасырда небір майталмандардың дүниеге келгенін айтып өтіп, солардың бірі де бірегейі Ақан серінің өмірі мен өнер жолына шолу жасады. Соңына өшпес мол мұра қалдырған Біржан сал, Ақан сері, Үкілі Ыбырай, Балуан Шолақ, Мәди, Естай тағы басқа тұлғаларды таныту мақсатында музей қабырғасында атқарылып жатқан жұмыстарға тоқталды.
«Ақан сері домбырасы музей сахнасында» аталған концерттік бағдарламада әнші-композитордың «Шәмшіқамар», «Маңмаңгерін» Қазақстанның еңбек сіңірген артисі Рамазан Стамғазиев, «Ақтоқтының Аужарын» Гүлсім Арысбаева, «Іңкәр-ай» әнін Жоламан Құжиманов, «Мақпалын» Айдана Асанбаева, «Балқадишасын» Талғат Әбуғазы, «Құлагерін» Тілеулес Құрманғалиев, «Шырмауығын» Аманкелді Күзеубай, «Майдақоңырын» Құралай Шаяхметова, «Көк көбелегін» Саят Нұрғазин, «Сырымбетін» Ерлан Төлеутай әуелете шырқады. Бұдан бөлек, Тәттімбеттің «Қосбасарын» Сырым Нұрмолдин төкпелетсе, Әбікен Хасеновтың «Қоңыр» күйін Мұрат Әбуғазы тарту етті.
Мақаланың толық нұсқасын осы сілтеме бойынша көре аласыздар